!!!!!!!!!!!!!!!!!!!!!!!!!!!!!!!!!!!!!

عملوا ايفينت عالفيس بوك من اسبوعين عشان نتجمع كلنا ... الفكرة كانت ظريفة , اننا نشوف صحابنا بتوع ثانوى تانى .. طبعا مش كلهم اعرفهم ..فى ناس علاقتى بيهم مستمرة لحد انهارده و ناس عارفاهم شكلا و ناس معرفهمش خالص ..اصل انا مكنتش بلعب مع اى حد ولا بكلم الوحشين اللى بيزوغوا من الحصص و يفضلوا قاعدين فى الحوش عالارض ويلعبوا فى التراب... انا كان عندى مبدأ , أروح المدرسه متأخرة مفيش مشاكل لكن ازوغ من حصة لا يمكن, ابهدل هدومى المكوية و اقعد عالارض ..مستحيييل

مستحيل اقل قيمتى  و اعرض نفسى لكلمة سخيفة من مدرس 

هو انا قلت ان التجمع كان انهاردة ؟؟ هو كان انهاردة 

و كان احساس غريب انى ارجع بالذاكرة 6 سنين و اكتر و افتكر تفاصيل و كلام مش عارفه اقول عليه ساذج ولا بريء

وانا ف اولى ثانوى كان فى 4 حاجات مميزة

انتفاضة فى القدس و مظاهرات و اعلام و شيلان فليسطينيه

الاسماعيلى خد الدورى و 3\4 اسماعيليه سقطت فيزيا عشان الماتش و الزفه كانوا ليلة الامتحان

كاس العالم و كان معروض كله على القناة التانية و انجلترا فازت على ما أذكر

اغنية انريكى اجلاسياس و كريستينا اجيوليرا الديو الجديدة الجامده جدا

بمقارنة بسيطه بين الاحداث هنكتشف ان انريكى اتأخر اوى يا جماعه ماينفعش كده عايزين الجديد بقى

واحده من اللى جم انهارده انا كنت فاكراها شكلا و عندى فكرة عنها الى حد ما -من اللى مكونتش بلعب معاهم- الجديد عليها ان عنيها ازرقت و معاها بيبى ..سلمت عليا و قالتلى انا فكراكى انتى كنتى احياء فى 2\8 ..ابتسمت عشان انا مكنتش فاكرة بصراحه انى 2\8 

قعدنا و عرفنا كليات بعض 

ومنتهى البراءة راحت قايلة

امممممم يعنى اللى دخلوا علوم وطب اهم ضيعوا حياتهم فى المذاكرة ..عملتوا ايه يعنى فحياتكوا !!!!!!!!! عشان تعرفوا انو مش بالمجموع

!!!!!!!!!!!!!!!!!!!!!

انا برغى بلااااااااا هدف

أصل بصراحه دمى محروق من امبارح

من ساعة ما قريت خبر خالد

بس مفيش كلام اقولوا 

و لو اتكلمت هكلم مين

ماحنا كلنا فيها

الخطوة الجاية هتكون فى البيوت

متبقوش تستغربوا

اصلا مش هتلحقوا

اشك ان خالد لحق يندهش او حتى يتخيل علامة تعجب

زمن علامات التعجب السعيد

خلص

.......